أول دمعة

من زمان أذكر في صغري *** وأنا طفل ببادي عمري
كانت أول دمعة زينب *** بالحزن من ﮔللبي تجري

منولد و السؤال إبخدي مذروف

مَدري زينب اسم من أربع حروف

لو من أربع مُهج طعنتها السيوف

و ابتديت أنعى طفل ويا ألمها

ذايب بكل حرف من اسمها

من زمان وهذا وضعي *** كربلا مأثره على سمعي
من ينادون على زينب *** نادت جروحي على دمعي

من زمان أذكر في صغري *** وأنا طفل ببادي عمري
كانت أول دمعة زينب *** بالحزن من ﮔللبي تجري

أذكر أمي تلفني بدمعة العين

وبنفسها على مهدي كتبت حسين

و كانت تغمض عيوني على بيتين

راحت إلكربلا بالسكينة

و رجعت منحله للمدينة

من زمان وهذا عهدي *** وأنا رهن ﮔماطي بعدي
كل مرثيه في زينب *** بدمعي كاتبها على خدي

من زمان أذكر في صغري *** وأنا طفل ببادي عمري
كانت أول دمعة زينب *** بالحزن من ﮔللبي تجري

من ﮔبل لا تشب سنيني بيَه

منهي زينب أسايل ﮔولوا ليَه

وأسمع الدنيا كلها ترد عليَه

هاي أخوها انجرح في عضيده

و تالي يمها إنذبح من وريده

من زمان و هذا همي *** و اذكر موصيتني أمي
مايفارﮒ ﮔللبي زينب *** لو تفارﮒ روحي جسمي

من زمان أذكر في صغري *** وأنا طفل ببادي عمري
كانت أول دمعة زينب *** بالحزن من ﮔللبي تجري

من رضعت المصيبة و صدري عطشان

للوجع واللطم بالونه لهفان

ما رضعت الهنا و زينب في أحزان

ظامي خيها اكتوى مع الترايب

بس ﮔللبها ارتوى بالمصايب

من زمان وهذا حالي *** أسهر بنوح الليالي
عالﮕمر أعتب واﮔله *** ارجع إلزينب ياغالي

من زمان أذكر في صغري *** وأنا طفل ببادي عمري
كانت أول دمعة زينب *** بالحزن من ﮔللبي تجري

مقالات ذات صلة

اترك تعليقاً

زر الذهاب إلى الأعلى