أدب المقاومة

كاس الماي

آنه كاس الماي لا تشربوني *** ذنبي شلته وياي لا تعذبوني

أخجل من كل دمعة عين .. وأحس بضرامي

آنه الما رّويت حسين .. وخليته ظامي

آنه كاس من خجل بالندم مصيوب

انسچب عالأرض وأشقى من الذنوب

وين أروح والتجي من عتب القلوب

آنه قلب الكاس مستحي امن الناس مالي وجه وعين

أروي كل ملهوف لكن بلطفوف مارويت حسين

كل ميت أحييه أنا *** وأطفي من حشاه العنا

هذي الآيه مبينه .. في كتاب الله

وشلون المعنى اختلف *** وحسين اتلوى وأسف

من قلبه الظامي نزف .. طفله عبدالله

مدري بيه شصار ماصرت حاني *** خايف امن النار من صرت جاني

وين الله يسامحني وين .. عظيم اتهامي

آنه الما رويت حسين .. وخليته ظامي

آنه كاس الماي لا تشربوني *** ذنبي شلته وياي لا تعذبوني

أخجل من كل دمعة عين .. وأحس بضرامي

آنه الما رّويت حسين .. وخليته ظامي

لا جريت بالهنى وتالي هالبلوى

ولا شرب ظامي من عذبي وتروى

لو أجف للحشر أدري ما أسوى

أجري في الأنهار ميت ومنهار من شعور اللوم

أنهمر شلال من حزن چتال أعتذر لليوم

چم ذنب اعليه انكتب *** ماعندي جواب وسبب

واستاهل كل العتب والصدق ينقال

ما داويت آنه الألم *** ماطفيت آنه الخيم

ما رويت آنه الحرم .. مارحمت أطفال

أهمي من الغيوم والمطر حزني *** وحوبة المظلوم ما تفارقني

كل أرض ارتسمت خدين وجرحي اللي هامي

آنه الما رويت حسين وخليته ظامي

آنه كاس الماي لا تشربوني *** ذنبي شلته وياي لا تعذبوني

أخجل من كل دمعة عين .. وأحس بضرامي

آنه الما رّويت حسين .. وخليته ظامي

تلتهب داخلي دمعة السجاد

والعتب آه يماي واحنه بالأصفاد

نرفضك ياللي ما بللت الأجساد

مارشحت صدور ماغسلت نحور قاسي بالغربة

جابك العباس وانته محني الراس تترك القربة

ظالم يا ماي النهر *** تشعر لو قلبك حجر

وش حدك دون البشر .. تقلب اعلينه

احنه بعدك نكتوي *** وانته الأفعى وتلتوي

كل العالم ترتوي .. والعطش لينه

هالعتب ما يروح لحظة من بالي *** أروي چم مجروح ميت قبالي

يا ويلي الأعذار منين .. شقول بكلامي

آنه الما رويت حسين .. وخليته ظامي

آنه كاس الماي لا تشربوني *** ذنبي شلته وياي لا تعذبوني

أخجل من كل دمعة عين .. وأحس بضرامي

آنه الما رّويت حسين .. وخليته ظامي

اترك تعليقاً

شاهد أيضاً
إغلاق
زر الذهاب إلى الأعلى