حبك يا حيدر لي نجاة وبلسم *** اليمنى تشهد والصدر يتكلم
ماحد جبرني آخذ قراري
حبك يا حيدر هذا اختياري
بيك اعتقادي وأنت افتخاري
وانت دخيلي عند احتضاري
حبك يابو اليمه عمل يترجم *** واليبغضك في النار هو يتحرجم
حبك يا حيدر لي نجاة وبلسم *** اليمنى تشهد والصدر يتكلم
ظلمة وكئيبة الدنيا عليّه
دهري فجعني بعظم الرزية
أخسوف وأهوال حلت سوية
بعدك يبو حسين ماهي هنية
هالضربة گشرة وصعبة ودمية
شگت جبينك يابن الشفية
وحزني وكربي صبح ومسية
ياليت جرحك صاب راسي وألم *** وخضب أدمومي بس راسك يسلم
حبك يا حيدر لي نجاة وبلسم *** اليمنى تشهد والصدر يتكلم
جبريل ينادي مات الولي اليوم
وحامي الحمى راح ما تمم الصوم
وچنه المنيه من حوله تحوم
إبچي يازينب وانعي يا كلثوم
بشروا هضايم من فعلة الگوم
عندي خبر صار باين ومعلوم
راسه يطبره ويسيّل إدموم
وسيف المرادي چتّال ومسموم
شوفوا الحزن فوگ العوالم خيم *** والعرش ماج من الحزن وتيتم
حبك يا حيدر لي نجاة وبلسم *** اليمنى تشهد والصدر يتكلم
ركن الهدى ماج وتزلزل الكون
وسبع السماوات أملاكه يبچون
ضجة وعزية للهام يلطمون
يبچون أبو حسين حسرة وينعون
وجبريل ينعى والدما ينصب دم *** يا با الحسن ركن الهدايه تهدم
أحزان وأشجان وخسوف وكسوف
والكون مرجوج ما صار مألوف
أملاكٍ وحور تتوافد إصفوف
نعش الوصي انشال من فوگ لچتوف
وبحور وولدان واولاده محفوف
محمول أبونا للجنة مزفوف
وجبريل وميكال من حوله أوگوف
ضربة الگشرى من الدعي بن ملجم *** صبّت على الدنيا الغوايل والهم
حبك يا حيدر لي نجاة وبلسم *** اليمنى تشهد والصدر يتكلم
إسم الله على طولك يا حامي الدين
يا شمعة الدار غوث لمسلمين
أخّر طلوعك لا تمشي ألحين
خلني أشمك وأشبچ باليدين
خلني أضمك بدامع العين
گبل المنية والموعد إيحين
لا يختلي البيت منك يابو حسين
خلنى أودع وأنصب هنا المأتم *** هذا الگضى المحتوم يابويه تم
حبك يا حيدر لي نجاة وبلسم *** اليمنى تشهد والصدر يتكلم
خوفي يا كرار يصدگ كلامه
وابن الدعية يحصل مرامه
وبعد المعزة نصبح يتامى
وقانون لوجود يفگد نظامه
تطلع ويبگى فجري بظلامه
ودعتك الله وامع السلامة
بانت علامات الأجل لمحتم *** هذا الخبر مكتوب ما يتكتم
حبك يا حيدر لي نجاة وبلسم *** اليمنى تشهد والصدر يتكلم
