أدب المقاومة

أوگف أني أمك بتأمل بمسراك

قصيدة عزائية محرم 1427 2007


أوگف أني أمك بتأمل بمسراك  *** طولك ورسمك وتزود بذكراك
وأصبر بضمك عين السما تبراك  *** ردتك بشمك يمه صعب فرگاك
ترب اليضمك ياليته ضمني أوياك  *** ولا صير بعدك ميسورة ويا أعداك

آه يابعد روحي..من يضمد جروحي  *** يمهدم صروحي..يابني يالكبر
يا شمعة أرجالي..لكبر يادلالي  *** ما ترفگ بحالي..گلبي تفطر

محلل ومبري الذمة يا چاوين  *** جاوب دمعتي يوليدي حاچيني
لا وينه رايح ولمن تخليني  *** گصدك تفتني لو يابني تجفيني
خيل وأسنة منك يطلبوني  *** تنتظرك سيوف الردة يا عيوني

أنت البطل وأنت الأمل يالثايرة عزومك  *** همة وعزم ماتنهزم خل تحچي اعلومك
تاج الفخر ردتك ذخر واليوم هو يومك  *** ما تهتني وماترتوي إلا من إدمومك

خل تعرف الأجيال..تضرب بك الأمثال  *** هذا درب لبطال..وهذي رجاله
رافض حياة الذل..دم مهجتك تبذل  *** وبكربلا تزلزل..حزب الضلالة
هذا على لكبر..رادي قوى المنكر  *** يوم الوعد كبّر..صوت العدالة
سيف وجهاد ودم..ولينكره يندم  *** ولراد يتگدم..يعلن نضاله

عزنا وفخرنا كربلا ماضينا والحاضر  *** يا مرحبا بيها وهلا والموقف الزاهر
فوز وسعادة ومرجله ولبيها نتفاخر  *** يا حي يوم الزلزلة حي يومه العاشر

دمنا لك نبذله..ما نرتضي الذلة  *** والحق ما نخذلة..بالروح نفديك
للطاغي ما ننقاد..والفاجر بن زياد  *** والطغمة الأوغاد..وللي يعاديك
تاج الفخر يا حسين..أنت عمود الدين  *** وبمنهجك ماشين..واحنا نواليك
لا سيف ولا مدفع..يرهبنا ما نرجع  *** هيهات ما نركع..ذبنا بمعانيك

لكبر علي يا صرخة الولاء  *** علمتنا الثبات والإباء

ألهمتنا الثورة والفداء

يامن الي السياف قلت لاء  *** كلا يزيد الظلم والبلاء

لا يوم إلا يوم كربلاء

خط الرسمته سطّر الخلود  *** ودم تضحياتك حدد المصير
بذل وعطاء وفلسفة وجود  *** درب الولاية نهجك البصير

لحسين راحت عن حالته تخبره  *** تنشد جنابه يامهجة الزهرا
أخذوا طفلكم طلبوا إله گطرة  *** عطشان وظامي طفوا لهب جمره
يدير بلسانه ينشدني بنظرة  *** يا يمه إسگيني لو دمعة عبرة

مدري شسوي محتاره في أمره


جف ونشف صدري..والله نفد صبري  *** حار وذهل فكري..إشلون أبسگيه !
بشهوره السته..والطفل شيسكته  *** وعباس ناشدته..ويش الفكر بيه ؟

شاله أبيّه للگوم يسگونه  *** وصاح بجمعهم هاللي تشوفونه
يتلوى ظامي تتراجف سنونه  *** بس عوده ذابل مشبوحة عيونه
ياوسفه ردهم بسهام يرمونه  *** وگصد الأعادي طفلي يذبحونه

عبدالله وش جرمه..سهم العدى يفطمه  *** وسفه أفل نجمه..وأعلن خسوفه
ظل سابح بدمه  *** وش حال گلب أمه
آه والنحر مگطوع..آه والگلب مفجوع  *** ونحنت مني ضلوع..وشلون أعوفه

يومٍ رجع گلبه نصدع  *** تتوجر جراحه
ومن الخيم جينه الحرم  *** إبصيحة ونياحه
ما ينوصف آه ياوسف  *** متوشح أوشاحه
وأمه تون وتنتحب  *** ماتهتني براحه
لگضي المر نار وجمر  *** وعيوني سفاحه

عبدالله ربيتك..من جوفي إسگيتك  *** بالمهد ناغيتك..محبوبي يالغالي
كل حين وتذكر..يوليدي وتصّور  *** ما غاب هالمنظر..لو لحظة عن بالي
كل ساعة وانشدك..چان أستمع ردك  *** كل يوم أهز مهدك..بس المهد خالي
لا تشتكي وجدك..حيدر علي جدك  *** يطفي لهب چبدك..من چفه الوالي

فدوى الى الدين والى الغريب  *** دمك يخط المنهج المصيب
وتشّيد صروح العلا ويطيب  *** هذا دربنا وعنه ما نغيب
عبدالله يابني ما إلك نصيب  *** ولا ترتوي لا بماي ولا حليب
قربان ولا زم هالأمر تجيب  *** وخدك على الغبرة يظل تريب
جابك أبوك بغصنك الرطيب  *** وخلآك عندي والنحر خضيب
وسبط النبي بس لا يظل كئيب  *** وعالغبرة يبگى عاري وسليب

2007/2/10

اترك تعليقاً

شاهد أيضاً
إغلاق
زر الذهاب إلى الأعلى